Introdución

 A entrevista é un xénero periodístico que reproduce unha conversa entre dúas ou varias persoas: un periodista que realiza as preguntas e unha persoa de relevancia póblica que as contesta. Este diálogo adoita estar planificado e acordado previamente, segundo os respectivos intereses das partes.

 É un xénero moi presente hoxe na prensa que permite ao lector un coñecemento directo da persoa entrevistada.

 Pode ser usada en crónicas e reportaxes como medio para procurar información.

 Os pasos para realizar unha entrevista son:

• Escoller o tema e a persoa que interesa entrevistar e documentarse sobre eles.
• Deseñar un guión coas preguntas para encamiñar o diálogo.
• Ter prevista a posibilidade de improvisar novas preguntas ao longo da conversa.
• Concertar unha cita co entrevistado indicando a razón da entrevista.
• Elixir imaxes para ilustrala.
• Escoller a canle para realizala (persoal, telefónica, escrita ...).

 Para garantir a veracidade da entrevista, e se o entrevistado o permite, é moi útil gravala a medida que se vaia realizando.

 Segundo o contido, existen distintos tipos de entrevistas:

• informativas: son as que pretenden dar a coñecer as opinións do entrevistado sobre temas xerais,
• de personalidade: son aquelas nas que se busca afondar na dimensión humana do personaxe,
• mixtas: son unha combinación das dúas anteriores.

 Características

• Dinámica: está baseada na sucesión de preguntas e respostas.
• De interese póblico: é un dos xéneros preferidos polos lectores.
• Veraz: o xornalista debe ser o máis fiel posible ao contido da entrevista.
• Áxil: é fluída e de fácil comprensión.

 Estrutura

 Nunha entrevista pódense distinguir as seguintes partes:

• Titular: é unha frase breve que recolle un aspecto clave da entrevista.
• Presentación: é un parágrafo que presenta a persoa entrevistada e o tema da entrevista.
• Desenvolvemento: sucesión de preguntas e respostas planificadas de antemán ou improvisadas en función da orientación da entrevista. As preguntas aparecen resaltadas tipograficamente (cursiva, negra...).
• Conclusión: son as palabras ou fórmulas lingüísticas empregadas para pechar a entrevista. Na entrevista oral adóitase rematar con agradecementos ao entrevistado; na escrita, cun comentario persoal ou conclusión do entrevistador.

 Exemplo