*Observa-la natureza no outono. Comenta-los cambios, as cores... Recoller materiais propios desta estación: follas de distintas formas, cores e tamaños, froitos, cogumelos...

*Observa-los cadros de Arcimboldo. Distingui-las estacións que representan, falar das diferencias. Faremos, posteriormente, entre todos a DAMA DO OUTONO: Debuxaremos nun papel continuo unha muller con capa e vestido longo (parecida a unha fada) e pegaremos nela as follas e froitos do outono.

*Facer individualmente un collage coas follas secas creando formas.

*Estampar libremente follas, castañas, cogumelos, coliflor ... facendo unha composición.

*Pinta-lo outono, observando directamente da natureza, se é posible. Antes fixarémonos nas cores utilizadas por Gran Wood no seu cadro “O solpor”. Podemos utilizar ceras brandas, ceras brandas diluídas con augarrás ou tamén usar rotuladores deixando caer pingas de auga enriba.

*Fixarse no “Campo de papoulas” de Monet. Comprobar que as flores miradas de preto son só manchas. Agora tócanos a nós: Pintaremos, con témperas aplicadas con esponxa, un fondo en distintos tonos de verde. Unha vez seco, faremos co pincel pequenas manchas de distintas cores a modo de flores.

*Confeccionar entre todos un mural da primavera. Utilizaremo-las témperas para pinta-lo ceo e o campo.

*Con distintos materiais (papel pinocho, charón, seda, revistas...)  e a técnica do collage farémo-las árbores, flores, nubes, arco da vella... Tamén podemos pegar debuxos recortados de flores, caracois, bolboretas...feitos polos nenos.

*¿Onde nos gustaría pasa-las vacacións de verán? Pintar con calquera técnica o lugar elexido, a praia, a montaña...

*Facer un mural dunha praia pegando distintos elementos naturais: area, cunchas...

*Despois de observa-la natureza no inverno pintar unha paisaxe coas árbores sen follas. Farémo-lo efecto da neve estirando co dedo plastilina branca nos tellados, nas polas ...