Estamos ante un REA (Recuso Educativo Aberto) pensado e realizado para aproximar as alumnas e os alumnos de 3.º de ESO ao coñecemento da organización política das sociedades e do ordenamento normativo autonómico, constitucional e supranacional nun contexto de globalización, movementos migratorios e interculturalidade.

A través dos textos, imaxes e as actividades propostas, o alumnado poderá incrementar os seus coñecementos sobre a temática antes mencionada. Para que os alumnos e alumnas poidan consolidar o aprendido proponse a realización dun reto (unha guía de acollida a dous compañeiros refuxiados). A través deste proxecto o alumnado poderá comprender mellor como funciona o mundo globalizado. Coñecer as causas e consecuencias das migracións e da interculturalidade así como o papel que desenvolven a ONU e a UE na defensa dos dereitos humanos e na acollida das persoas refuxiadas. Por último, familiarizarse coa organización política e territorial de España . 

Ao longo das 17 sesións de traballo nas que se desenvolverá este REA o alumnado deberá ser quen de acadar as seguintes metas de aprendizaxe:

• Que é a globalización, as súas causas e consecuencias.
• A diferenza entre multicuturalidade e interculturalidade.
• As características, causas e efectos dos movementos migratorios.
• Que son os estados, os seus tipos e funcións.
• Que son e como funcionan a ONU e a UE.
• As características básicas da estrutura institucional de España e da súa organización territorial.
• Adoptar unha posición crítica fronte a postulados belicistas, xenófobos ou discriminatorios.
• Usar adecuadamente as ferramentas informáticas para o tratamento da información.
• Traballar en grupo de xeito organizado e efectivo.
• Seleccionar e xerarquizar a información.
• Expoñer de maneira pública e clara o resultado do seu traballo.