O deseño deste REA (Recurso Educativo Aberto) englóbase no marco pedagóxico do proxecto cREAgal. O seu obxectivo principal é ofrecer ao alumnado unha aprendizaxe significativa, baseada na resolución dun reto conectado coa realidade social (a soidade non desexada nas persoas maiores) e que esixe a toma de decisións, a creatividade e o desenvolvemento da competencia comunicativa.

Desde o punto de vista metodolóxico, este recurso é fundamentalmente activo e participativo. A materia de Lingua Castelá e Literatura desenvólvese aquí a través dunha dobre dimensión: reflexiva (analizando os ingredientes da narración e a propia biografía lectora) e creativa (escribindo e narrando historias). As situacións propostas están contextualizadas na vida diaria e buscan un impacto real na contorna a través dunha proposta de Aprendizaxe-Servizo (ApS): aprender os contidos curriculares mentres se realiza un servizo á comunidade (acompañamento a maiores).

Para iso, intégranse referencias á vida cotiá co fin de motivar ao alumnado e facelo sentir parte activa do proceso de ensino-aprendizaxe. Búscase un enfoque que sexa:

• Contextualizado: o alumnado debe comprender que escribe para un público real, o que dota de sentido a todo o traballo de redacción e corrección.
• Significativo: partimos da propia "biblioteca persoal" do alumnado e das súas emocións para construír novos coñecementos sobre a narración.
• Funcional: búscase a utilidade práctica do aprendido (oralidade, cohesión textual, empatía) en situacións reais de comunicación.

En canto á organización da aula e as estratexias didácticas, este REA aposta por:

• Agrupamentos flexibles: combínase o traballo individual (reflexión, redacción de borradores) co traballo cooperativo en parellas ou pequenos grupos para a xeración de ideas e a revisión. Foméntase unha colaboración fluída onde o alumnado se apoia mutuamente segundo as necesidades da tarefa (investigación, escritura, ensaio de lectura).
• Atención á diversidade (DUA): o recurso persegue a accesibilidade cognitiva e a inclusión. Ofrécense materiais en múltiples formatos  e propostas de actividades abertas ou "menús" de escritura (tradición, fusión, creatividade) que permiten ao alumnado escoller o enfoque que mellor se adapte ás súas capacidades.
•  Avaliación formativa: o erro considérase parte do proceso. A través da revisión de borradores, as listas de cotexo e a coavaliación, búscase que o alumnado mellore as súas producións de xeito progresivo antes do produto final.

Para rematar, cómpre salientar que o desenvolvemento desta situación de aprendizaxe aspira a espertar no alumnado a sensibilidade estética e a capacidade expresiva, partindo do dominio teórico e práctico da narración literaria. Búscase potenciar non só a imaxinación e a creatividade á hora de cociñar historias, senón tamén a intelixencia emocional necesaria para conectar coa realidade das persoas maiores. Así mesmo, preténdese fomentar un espírito crítico ante as obras literarias e audiovisuais traballadas, adquirindo as destrezas precisas para empregar a palabra —tanto escrita coma oral— como un poderoso recurso de transformación persoal e comunitaria.