Recursos materiais necesarios

• Cartolinas en tamaño A2.
• Folios de distintas cores. 
• Tesoiras. 
• Pegamento.
• Lapis, bolígrafos e rotuladores.

Proposta de agrupamentos para actividades grupais

Para a realización do reto, recoméndase que o profesorado deseñe grupos heteroxéneos dun máximo de catro persoas en función das súas diversas capacidades e habilidades, para que cada quen poida desenvolver o seu máximo potencial. Ademais de aumentar a súa propia autonomía persoal, co traballo cooperativo o alumnado realizará prácticas comunicativas para seleccionar a información, tomar decisións e elaborar a parte do libro interactivo que lle corresponda. 

Procurarase que todo o alumnado de cada grupo, de xeito máis ou menos directo, participe na investigación, na toma de decisións e na creación. Un dos membros do equipo asumirá o rol de coordinador e voceiro coa persoa docente. 

As actividades de carácter individual realízanse tanto coa computadora como co caderno persoal e corríxense mediante a autoavaliación ou as rúbricas de expresión, tanto escrita como oral. 

Produtos finais

O reto acádase ó xuntar os lapbooks deseñados por cada grupo. Unha vez constituído o mapa no que se representa a diversidade lingüística de España, procédese a expoñelo na biblioteca do centro para que todo o alumnado visitante poida interactuar con el no marco da conmemoración do Día Europeo das Linguas. 

Enfoque multinivel do reto

Este reto artéllase en dous momentos: o primeiro consiste nunha indagación guiada sobre a lingua que corresponda a cada grupo, mentres que o segundo xira en torno a unha achega á súa contorna cultural. Así pois, para recoller información sobre unha lingua, cada equipo pode escoller entre tres niveis de perfeccionamento: 

• Nivel aprendiz: con esta guía o alumnado deberá recoller información sobre o número de falantes, a extensión xeográfica, o recoñecemento legal, a orixe, os trazos lingüísticos distintivos, a súa presenza na escola, nos medios de comunicación, na contorna social e a súa preservación. 
• Nivel profesional: o alumnado poderá, ademais de responder as cuestións do nivel aprendiz, afondar no coñecemento da lingua explorando sobre as mostras literarias máis destacadas e, incluso, seleccionar unha canción coñecida nesta lingua. 
• Nivel experto: acadados os obxectivos dos niveis previos, aquel alumnado que o desexe tamén recollerá dúas frases feitas ou refráns nesta lingua e explicaraos, e incluirá, canto menos, unha ligazón que permita, a quen lle interese, pescudar máis información sobre esta lingua. 

Nun segundo momento, a achega á contorna cultural e social na que se emprega esa lingua, atendendo ós modelos proporcionados, cada grupo poderá realizar un dos seguintes textos. Neles tamén empregará o código investigado facendo uso dos tradutores facilitados. Os textos posibles son: 

• Modelo de guía de visitantes: nel recollerán expresións que permitan saudar, recibir orientacións ou acceder a servizos como a hostalería. 
• Modelo de folleto turístico: este documento debe conter teléfonos de contacto, transportes, aloxamentos, curiosidades, eventos, restaurantes e lugares que visitar. 
• Modelo de programación cultural: o alumnado seleccionará os concertos, actuacións teatrais, conferencias e obradoiros, entre outros. 

Cómpre mencionar que os grupos que se movan no nivel aprendiz só realizarán un destes textos a elixir; no nivel profesional poderán escoller dous, mentres que no nivel experto terán que realizar os tres textos. 

Proposta lectora

A viaxe pola diversidade lingüística de España pode completarse cunha reflexión lingüística global en torno á lectura persoal da obra de Jonathan Swift Los viajes de Gulliver.