O ADN dos deportes de equipo

"O ADN dos deportes de equipo" é un Recurso Educativo Aberto (REA) deseñado para descubrir, investigar e innovar as regras dos deportes en equipo, e ser capaces de deseñar e innovar todos estes aspectos na procura dun deporte máis coeducativo e que fomente valores de respecto e igualdade.

Aínda que existen milleiros de deportes de equipo e, a primeira vista, moitos deles parecen mundos totalmente opostos, todos comparten un mesmo corazón. As regras, os espazos ou os materiais poden desorientarnos nun primeiro momento, pero se aprendemos a mirar máis aló da superficie, descubriremos que a linguaxe do deporte colectivo é sempre a mesma. Conceptos como a cooperación, a oposición, a toma de decisións ou a estratexia repítense en todos eles.

Nesta aventura converterémonos en auténticos exploradores dos deportes de equipo, tanto convencionais como alternativos. Ao longo do camiño non só coñeceremos novas formas de xogar, senón que aprenderemos a analizar e comprender que teñen en común todos estes deportes. Buscaremos esa esencia transversal, esa “chave mestra”, que permite adaptarse, aprender máis rápido e afrontar con éxito calquera reto colectivo.

Ao rematar este REA, xa non haberá deporte que se resista. Contarás coas ferramentas necesarias para entender as regras, gozar do xogo e participar de maneira activa e consciente. Pero, sobre todo, estarás preparado para ir un paso máis aló: crear, modificar e deseñar as túas propias regras de xogo, dando vida a novos deportes de equipo.

Metas de aprendizaxe:

Analizar e comparar as características básicas dos deportes colectivos e alternativos (regras, espazo, material, roles e obxectivos) para identificar elementos transferibles a un novo deporte.
Aplicar principios de xogo limpo, cooperación e inclusión no deseño dun deporte de equipo propio, garantindo a participación activa e equilibrada de todas as persoas xogadoras.
Crear, innovar e xustificar as regras, o sistema de puntuación e a organización do xogo dun novo deporte colectivo, explicando as decisións tomadas a partir de deportes coñecidos.
Desenvolver habilidades de traballo en equipo e comunicación, colaborando na creación, presentación e mellora do deporte deseñado.
Avaliar criticamente o deporte creado, identificando fortalezas, posibles melloras e adaptacións para distintos contextos educativos ou niveis de habilidade.

Que é unha situación de aprendizaxe?

Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.

Ao longo do proxecto, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordándoos a través de metodoloxías activas.

As situacións de aprendizaxe do proxecto cREAgal estrutúranse en cinco fases.

A primeira fase está centrada na motivación do alumnado, a identificación da temática e a descrición do reto.
A segunda fase trata de activar os coñecementos previos do alumnado.
Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado coas novas aprendizaxes.
Na cuarta fase, o alumnado desenvolverá o reto proposto poñendo en xogo todo o aprendido.
Por último, a quinta fase, está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.