Galegas polo mundo!
Este é un Recurso Educativo Aberto (REA) deseñado co fin de achegar ao alumnado de 2º de Ensino Secundario Obrigatorio á danza e ao xogo como medios de expresión corporal e como ferramentas de transmisión cultural e de valores.
O REA articúlase arredor dunha Situación de Aprendizaxe (SA) na que o alumnado, traballando en pequeno grupo, deberá organizar unha emisión en directo, simulando vivir nun país estranxeiro desde o que realiza conexións cun estudio de gravación localizado en Galicia. Para levar a cabo esta emisión, o alumnado terá que traballar a danza e o xogo en pequeno grupo, elaborando unha representación que permita poñelos en valor non só como prácticas físicas que favorecen a coordinación, senón tamén como elementos transmisores do modo de vida dun pobo.
As metas de aprendizaxe son:
- Empregar o corpo como ferramenta de expresión e comunicación.
- Coñecer, practicar e valorar xogos e danzas populares galegas e doutras culturas.
- Mellorar a expresión corporal, a coordinación, o ritmo e o control do movemento.
- Traballar en equipo de xeito colaborativo e respectuoso, empregando as habilidades sociais e o diálogo para resolver conflitos.
- Levar a cabo unha práctica motriz saudable e responsable cos demais e co medio.
- Empregar aplicacións dixitais como apoio na práctica de actividades físicas.
Que é unha situación de aprendizaxe?
Trátase dunha secuencia de aprendizaxe na que se propón, mediante unha contextualización motivadora conectada coa realidade do alumnado, a superación, de forma cooperativa, dun reto ou dunha problemática mentres se traballan os contidos propios da área.
Ao longo do proxecto, e de maneira interdisciplinar, expóñense os coñecementos, destrezas, valores e actitudes mediante un enfoque competencial e abordándoos a través de metodoloxías activas.
As situacións de aprendizaxe do proxecto cREAgal estrutúranse en cinco fases.
- A primeira fase está centrada na motivación do alumnado, a identificación da temática e descrición do reto.
- A segunda fase trata de activar os coñecementos previos do alumnado.
- Na seguinte fase, a terceira, lévase a cabo unha conexión entre as aprendizaxes, habilidades e destrezas que xa posúe o alumnado coas novas aprendizaxes.
- Na cuarta fase, o alumnado desenvolverá o reto proposto poñendo en xogo todo o aprendido.
- Por último, a quinta fase está reservada para a valoración xeral da actividade, a coavaliación de retos, a propia autoavaliación e a recompilación de propostas de mellora.