O sector agrario

En Galicia, máis do 97 % da superficie ten carácter rural, o que reflicte, aínda a pesar de todo, a forte importancia agraria e gandeira. Os prados e pastos representan máis da metade da superficie agraria. Ademais, unha parte importante das terras dedícase aos cultivos forraxeiros, sobre todo ao millo para alimentar o gando. Galicia concentra o 28 % da superficie forraxeira de todo o Estado, o que explica o peso do sector gandeiro, especialmente o vacún, especialmente para a produción leiteira, aínda que hai tamén para a produción de carne.

Coñeces o gando autóctono galego? Preme nesta enlace da Consellería de Medio Rural.

As industrias agroalimentarias teñen un carácter estratéxico en Galicia por ser un elemento clave para o desenvolvemento do sector agrario, baseada en produtos con distintivos de calidade, como son as denominacións de orixe protexida (DOP) ou indicacións xeográfica protexida (IXP), que serven para garantir a calidade do produto. Para garantir, por exemplo que os pementos de Padrón, sexan de Padrón, ou o bonito de Burela, foi descargado na lonxa de Burela. Garante a orixe e a trazabilidade do produto.

Tamén destacan os cultivos de secaño, principalmente nas zonas do interior, como o trigo, o centeo, o millo gran ou a faba seca. Nas zonas atlánticas, máis húmidas, predominan o millo forraxeiro e a pradería. Entre os cultivos de horta cómpre salientar o tomate, a leituga, o pemento, a cebola, a faba ou o repolo. A pataca mantense como un cultivo importante, sobre todo en zonas como a Limia: Galicia produce o 16,3 % de toda a pataca española.

As castañas forman parte importante do sector agrícola galego, estímase que hai 26.424 ha de castiñeiros, dedicadas a súa produción, de maneira especial en zonas do interior de Ourense, onde tamén se está introducindo con éxito a oliveira, enfocada a produción de aceite.

Dentro do sector, hai espazo para a innovación tamén: na actualidade máis de 4.000 explotacións agrícolas galegas están a empregar unha plataforma dixital PDAGRO para xestión agroforestal, apoiados na IA para o asesoramento sobre fertilizantes, previsión de enfermidades.

Un dos cultivos máis dinámicos do campo galego é a produción vitícola, en Galicia o viñedo ocupa 24.517 ha, cunha gran presenza no sector vitícola español, xa que Galicia conta con cinco denominación de orixe protexidas (D.O).

As D.O. dos viños galegos

1. Rías Baixas
2. Ribeiro 
3. Ribeira Sacra 
4. Valdeorras
5. Monterrei

Este é un sector en auxe, cun aumento do 9 % na produción de viño no último ano. Galicia é a comunidade con máis viticultores, aínda que a súa produción non é tan alta como noutras comunidades con igual superficie, o que evidencia a dificultade de mecanizar o proceso.

Os sectores pesqueiro e forestal

A relevancia do sector pesqueiro en Galicia é indiscutible. Segundo datos da Conselleria do mar, conta cunha frota que rolda os 4.500 barcos, liderando a frota española e comunitaria, e unhas descargas de peixe fresco que superan as 130.000 toneladas anuais e nun volume de negocio que ultrapasa os 435 millóns de euros. Trátase, ademais, da única actividade económica galega que conseguiu conservar os seus niveis de produtividade nos últimos anos.

A frota galega divídese en:

• Frota costeira, que inclúe os barcos dedicados á faena artesanal e litoral. Está formada por buques de pequeno porte e características moi diferentes que adoitan volver a porto no día.
• Frota de altura, faenan en augas comunitarias non españolas. Alí traballan máis de 70 pesqueiros con porto base en Galicia. Destacan as áreas do Gran Sol,  Sur e do Oeste de Irlanda , nas costas de Francia. Faenan ao arrastre e ao palangre de fondo para capturar pescada, galo, rabada e lagostino e os portos máis importantes para estes buques en Galicia son A Coruña, Vigo, Marín, Celeiro e Burela.

Non podemos esquecer as actividades relacionadas co marisqueo xa que ten un peso económico e social moi destacado en Galicia, pois proporciona os ingresos a case 4.000 persoas que traballan no marisqueo a pé, a maioría delas mulleres. Pola contra, o marisqueo a flote está maioritariamente en mans de homes. As especies máis habituais que recollen os mariscadores a pé son: a ameixa xaponesa, a ameixa fina, a ameixa babosa e o berberecho. Hai que destacar tamén a acuicultura co cultivo de moluscos bivalvos especialmente do mexillón cultivado en batea.

A silvicultura e sector forestal

O sector forestal galego representa o 12 % do emprego industrial de Galicia. Boa parte desta actividade concéntrase en comarcas de natureza rural, onde supón unha das poucas actividades industrializadas. 

Galicia sitúase como a novena potencia forestal de Europa e encabeza o sector no conxunto do Estado. O sector da madeira galego achega o 1,7 % ao PIB da comunidade, segundo datos do IGE.

Galicia conta con arredor de 620.000 hectáreas de frondosas caducifolias (carballos, castiñeiros, faias,...), 420.000 hectáreas de coníferas (piñeirais) e 409.000 hectáreas de eucaliptos.