Obxectivos para o Desenvolvemento Sostible
Nos últimos anos veriades ou escoitariades, nos medios de comunicación, multitude de noticias sobre catástrofes naturais (incendios, inundacións, dinas, …), crises hídricas (falta de auga nos vosos concellos, vilas e aldeas). Algo parece estar a cambiar no noso planeta!
No ano 2015, os gobernos de 193 países membros de Nacións Unidas (ONU) desenvolveron un plan de acción global para o desenvolvemento sostible no noso planeta. Falamos da Axenda 2030, que se estrutura en 17 Obxectivos de Desenvolvemento Sostible (ODS) baixo o lema “non deixar a ninguén atrás”. O desafío deste plan é erradicar a pobreza e as desigualdades no mundo; reverter o cambio climático, ou polo menos frealo; asegurar a prosperidade, defender a paz e a xustiza de todos os seres humanos, en definitiva, protexer o planeta e procurar un novo contrato social global.
Para que estes 17 obxectivos se convertan en realidade, é precisa a implicación dos gobernos (nacionais e locais), das empresas privadas, da sociedade civil e de todos e cada un de nós.
Lectura facilitada
Nos últimos anos vimos e escoitamos moitas noticias nos medios de comunicación.
Estas noticias falan de catástrofes naturais, como incendios ou inundacións.
Tamén falan de falta de auga en concellos, vilas e aldeas.
Todo isto indícanos que algo está a cambiar no noso planeta.
No ano 2015, os gobernos de 193 países que forman parte da ONU crearon un plan para coidar a Terra e ás persoas.
Este plan chámase Axenda 2030.
A Axenda 2030 ten 17 Obxectivos de Desenvolvemento Sostible (ODS).
O seu lema é: “non deixar a ninguén atrás”.
Os obxectivos buscan:
- Acabar coa pobreza e coas desigualdades.
- Frear o cambio climático.
- Asegurar unha vida digna para todas as persoas.
- Defender a paz e a xustiza.
- Protexer o planeta.
Para que estes 17 obxectivos se cumpran, todas as persoas son importantes.
É necesaria a colaboración:
- Dos gobernos.
- Das empresas.
- Das asociacións.
- De cada unha de nós.
