Ao chegar a Aldea Vella atopades os veciños e as veciñas reunidos na praza da vila, ao redor da súa alcadesa Maruxa, que é a persoa máis nova do lugar, o resto dos habitantes superan cumpridamente os 65 anos. 

Todas e todos están moi preocupados pola vaga de lumes deste ano, aínda que, a súa aldea salvouse dos incendios, a veciñanza quere buscar solucións para evitar que lles pase ningunha desgraza no futuro. Son maiores, son poucos, e pensan que non saberían moi ben que facer no caso de que lles afectase unha situación coma a deste ano.

Entre todas e todos, chegan á conclusión de que precisan de axuda para redactar un bando municipal no que se informe a veciñanza, e incluso a vilas veciñas, de que medidas deben adoptar para evitar futuros incendios.

Xa que chegastes nun momento tan importante para a aldea, por que non axudalos a redactar e a publicar o bando para tentar salvar a súa aldea de futuros lumes?. Unha ollada desde fóra da aldea, pode achegar unha visión máis precisa dos problemas que ten este núcleo rural, que está sendo afectado polo despoboamento e o abandono do monte. Aldea Vella confía en vos para buscar unha solución!

Para axudar a comunidade de Aldea-Vella, faredes unha investigación e análise para salvar a esta aldea do abandono. Proporedes solucións, que estarán rexistradas no bando municipal, para protexer a aldea.

Os obxectivos do reto son a comprensión das relacións existentes entre a natureza e a sociedade, a pegada humana no medio e na vosa contorna próxima (desde o voso concello ata o planeta), coñecendo o espazo natural e rural, así como analizar as formas de poboamento e a súa transformación, no noso tempo.

Superado o reto, poderás: 

• Entender o funcionamento do modelo de consumo na nosa contorna (Galicia, España e Europa).
• Entender os principais problemas medioambientais derivados do cambio climático.
• Coñecer as características do sector primario en Galicia, e as súas opcións de futuro.
• Comprender a evolución da poboación europea, española e galega, con especial énfase no rural galego.
• Identificar os principais retos demográficos e económicos actuais no mundo rural.