3.1. Diferentes tipos de textos? Imos aló!

Glosario

Argumento

Definición:: Razoamento con que se proba ou demostra algo.
Exemplo:: Non daba argumentos convincentes.

Declaración

Definición:: Comentar e dar a coñecer algún tema.
Exemplo:: O xornal publicou unhas declaracións do presidente.

Evidencia

Definición:: Algo que é certo e seguro.
Exemplo:: A evidencia de que a auga molla.

Folclore

Definición:: Conxunto de tradicións, costumes, manifestacións artísticas etc., dun pobo.
Exemplo:: O baile da muiñeira forma parte do folclore galego.

Impersoal

Definición:: Algo que non pertence ou non está dirixido a unha persoa en particular.
Exemplo:: Comentou os erros de maneira impersoal.

Rigoroso

Definición:: Persoa que fai unha cousa ou di algo de maneira severa e sen facer excepción.
Exemplo:: O xuíz foi moi rigoroso.

Veraz

Definición:: Son cousas que corresponden á realidade con exactitude e que é verdade.
Exemplo:: Non dubido das súas palabras porque é unha persoa veraz.

Que imos aprender?

Sabes que hai diferentes tipos de textos? Queres aprender cales son?

Pois non te preocupes…ímosche amosar e explicar algún tipo de texto como é o texto argumentativo, informativo e de opinión.

Vas aprender a comprender e analizar estes diferentes tipos de textos.

Prepárate!

Os textos argumentativos

Falar de un mesmo

É como cando tes unha discusión coas túas amistades sobre que xogo é mellor: fútbol ou baloncesto? Cada unha dá as súas razóns de por que cre que o seu xogo favorito é o mellor. Nun texto argumentativo, as persoas escriben sobre un tema e dan razóns de por que cren que algo é certo ou importante. Poden dicir "penso que..." ou "creo que..." e explicar por que están de acordo ou en desacordo con algo.

Os textos informativos

Información

Lembras cando estudaches sobre os dinosauros e aprendiches os seus nomes e como vivían? Iso é un texto informativo. Nestes textos, a xente escribe para contarnos sobre algo, como un animal, un lugar ou un descubrimento. Non dan a súa opinión, só nos dan feitos e axúdannos a aprender máis sobre o tema.

Os textos de opinión

Falar

Ás veces, cando escoitamos a mamá ou papá falar sobre que película ver, din "Creo que deberiamos ver esta porque é divertida". Iso é unha opinión. Nun texto de opinión, as persoas escriben sobre o que pensan ou senten acerca de algo. Poden dicir "gústame..." ou "non me gusta..." e explicar por que teñen esa opinión.

Lectura facilitada

Hai diferentes tipos de textos:

1. Textos argumentativos.- As persoas escriben sobre un tema e dan razóns de por que cren que algo é certo ou importante.

2. Textos informativos.- A xente escribe para contarnos sobre algo, como un animal, un lugar ou un descubrimento.

3. Textos de opinión.- As persoas escriben sobre o que pensan ou senten acerca de algo.

Audio

Escoitade estes audios sobre estes tres tipos de textos!

Agora que xa sabedes un pouco máis sobre os textos que aprenderedes, escoitade en grupos, e con axuda do mestre ou mestra, estes tres audios e a ver se sabedes diferenciar cal é argumentativo, cal informativo e cal de opinión.

Adiante!

Transcricións dos audios:

Audio 1

Antón, o outro día, cando fun a buscarte á escola, vin un camión para doar sangue no noso concello. Estiven pensando que poderías vir comigo aínda que xa sei que non soportas as agullas. Aínda así deberías facelo pois podes salvar moitas vidas!

Audio 2

O Apalpador é unha figura tradicional do folclore galego. Este personaxe, caracterízase por ser unha figura bondadosa que toca suavemente os ventres das persoas, especialmente dos nenos e nenas, para comprobar se comeron o suficiente durante o ano.

Audio 3

Ola amigos e amigas! Sabiades que en Galicia, unha terra chea de maxia e tradicións, fálase unha lingua moi especial chamada galego? Si, así é, e hoxe quero contarvos por que creo que o galego é algo marabilloso. Pois, o galego ten palabras que soan como cancións. Déstesvos conta do bonita que soa algunha palabra coma "lúa"? É coma se a palabra tivese a súa propia música!