Congreso de Ciberseguridade

O guión

Preparade o guión da vosa exposición, é dicir, o que lle ides contar ao resto da clase.

Lembrade incluír:

• Unha breve introdución ao caso que vos tocou resolver.
• A explicación do proceso de resolución que aplicastes.
• As conclusións do grupo (medidas preventivas, ferramentas de diagnose a empregar no futuro...).

A exposición

Proxectade o produto visual que elaborastes e explicádello ao resto da clase.

Establecede ben a quenda de intervención de cada membro do equipo, xa que todas as persoas integrantes deben participar.

Podedes ter o voso informe forense dispoñible, pero tede en conta: 

• Non leades todo o texto, explicade coas vosas palabras.
• Empregade o voso documento como apoio, non como guión completo.
• Falade cun volume adecuado, e mirade ao público durante a presentación.
• Escoitade con atención as preguntas ou comentarios que vos faga o público e respondédeas con solvencia. Recordade que, se non os usastes na resolución do caso, dispoñedes de dous comodíns por se algunha pregunta non sabedes ou preferides que a responda outra persoa.

A avaliación e reflexión final

Mentres que non estás a facer a túa intervención, debes valorar a do resto de equipos. 

Para iso, emprega a rúbrica de coavaliación que atoparás máis abaixo.

A túa opinión é moi valiosa, así que fai valoracións obxectivas e construtivas.

Ao finalizar a exposición de todos os equipos, podedes facer unha mesa redonda a modo de reflexión grupal das conclusións obtidas deste congreso.