Glosario

Antepasado

Definición:: É un ser vivo que existiu antes e do que descenden outros.
Exemplo:: LUCA é o antepasado común de todos os seres vivos.

O home descende do mono!

De certo que non é a primeira vez que o escoitas:

O home descende do mono!

Pois se trata dunha cuestión científica que non é certa e cómpre aclarar.

evolución humana

Esta afirmación foi feita por primeira vez para ridiculizar e poñer en cuestión a teoría da evolución de Darwin, e, como moitas outras cousas, foi sendo transmitida ata que se converteu en algo que a maioría da xente dá por certo.

Cando dicimos "o home descende do mono" todo o mundo pensa nun chimpancé como antepasado noso, máis iso non é así e convén aclaralo.

O ser humano e os monos actuais compartimos un devanceiro común. Desde o punto de vista evolutivo, todos os seres vivos estamos relacionados. Compartimos antepasados cos monos actuais, pero tamén cos ratos, coas galiñas e con todos os seres vivos. A clave disto é saber cando se separaron as liñas evolutivas.

Si é certo que compartimos máis características xenéticas cos monos actuais que cos ratos, xa que o noso predecesor común é máis recente. Os científicos estiman que o antepasado común entre o ser humano e os monos viviu hai entre 4 e 13 millóns de anos.

En ciencia é moi importante empregar termos adecuados baseados no saber científico. Polo tanto, os humanos non descendemos dos monos, o que pasa é que compartimos un antepasado común.

Cóntocho no seguinte son:

Lectura facilitada

Seguro que escoitaches algunha vez que "O home descende do mono!"
Trátase dunha cuestión científica que non é certa.

Dixérona a primeira vez para ridiculizar e poñer en cuestión a teoría da evolución de Darwin.
Foise transmitindo e a maioría da xente a dá por certa.
Cando se di "o home descende do mono" todos pensamos incorrectamente nun chimpancé como antepasado noso.
O ser humano e os monos actuais compartimos un antepasado común.
Desde o punto de vista evolutivo todos os seres vivos estamos relacionados.
Compartimos antepasados cos monos e con todos os seres vivos.
A clave disto é cando se separaron as liñas evolutivas.
Compartimos máis características xenéticas cos monos actuais que cos ratos.
O predecesor común entre humanos e monos é máis recente que o predecesor común de humanos e ratos.
O antepasado común entre o ser humano e os monos viviu hai entre 4 e 13 millóns de anos.
En ciencia é moi importante empregar termos adecuados baseados no saber científico.
Os humanos non descendemos dos monos.
Os humanos e os monos compartimos un antepasado común.

Audio

A ver se o entendiches

Responde no teu caderno (fai clic na imaxe para vela ampliada):

No esquema cal é a letra que representa o antepasado común dos chimpancés e os seres humanos?
E os antepasados de todos os que se observan no esquema?
Que é c e b?
Gardamos un maior parecido cos lémures ou cos gorilas?
Segues pensando que os seres humanos descenden do mono?